Storie

I boscs de basse furlane a son ce che al reste de antighe “Silva lupanica”, il bosc grandonon che une volte al cuvierzeve dute la planure da la Livence al Lusinç.

Intal teritori dal comun di Muçane, lontan un centenâr di metris de linie di cueste de marine di Maran, a son restâts ancjemò doi boscs di latifoliis, massime rôl e çamar: il Bosc Baredi/Selva d’Arvoncli, grant sù par jù 170 etars, e il bosc Code di Manin, di sù par jù 150 etars.

A son dôs formazions di bosc “relit”, lontanis uns cent metris la une di chê altre e sieradis de bande di soreli a mont dal canâl Turgnan e de bande di soreli jevât dal canâl Cormôr. Tra lis dôs al passe il canâl Muçanele, cu la antighe strade clamade “Levade dal Princip” che i cor dilunc e che vie pe ete veneziane e menave de fuartece di Maran a chê di Palme, passant pal bosc e pal paîs di Muçane.

I doi boscs, une vore siôrs di rôi e di çamars, a son i plui larcs te plane furlane e venite e, adun cul Bosc Sacîl di Cjarlins, a son ce che al reste de antighe Silva Magna, vuê cognossude tant che Silva Lupanica, il bosc di lôfs che sul finî des grandis glaciazions dal Würmian (uns 10000 agns indaûr) al tacà a cuvierzi dute la plane padane. Al è par chest che si definissin “relits”, par vie che a àn rivât adore a resisti a secui di disfrutament di bande dal om e aes crisis climatichis. In dì di vuê, a rapresentin un satûl preziôs di biodiversitât, li che a resistin e a vivin cetantis speciis di plantis, musclis e foncs, che la plui part e je disparide te plane antropizade dut ator.

Par vie de conformazion gjeologjiche, la zone e je siore di risultivis, ven a stâi olis di li che a ven sù la aghe de falde, si che duncje tai boscs di Muçane si cjatin “relits glaçâi”, o ben chês speciis microtermichis che a vivin a di une temperadure dal teren plui basse rispiet a chê des areis dulintor, in gracie de azion de aghe di falde che e ven sù in superficie. A fasin part di chestis speciis il Populus tremula, il Lilium martagon e il Veratrum album.

Chestis speciis nus contin di une ete lontane di 11500 agns indaûr, cuant che e je finide la ultime glaciazion dal periodi würmian e lis speciis des areis alpinis a àn biel planc tornât a cjapâ possès des zonis cuviertis fin a chel moment di glaçârs: prime dome tant che formazions di peç e po dopo (sù par jù uns 6000-7000 agns indaûr) adun cui rôi e cui çamars che si puedin cjatâ inmò in dì di vuê. Adun cun chestis speciis, a ‘nt vivin altris de micro e de macro faune, peadis insiemi intun ecuilibri simbiotic.

“che se non fossero li boschi dalli quali ai tempi debiti et opportuni si serviamo saressemo isforzziati a bandonare il paese et morirssi di fame”

(Vicinie di Muçane, 12 di lui dal 1598)

Chescj boscs, che vie pe ete romane a fasevin part dal Ager di Aquilee, a jerin stimâts tant che sacris e ur garantivin ce vivi ai abitants de zone, in plui di jessi un ricet sigûr pes bestiis.

Za a tacâ dal periodi feudâl furlan, intal secul IX, la zone e vignive clamade “silva et pratis” (boscs e prâts) e e cjapave dut il teritori comunâl jenfri la Muçanele e il Turgnan, a Sud dal paîs. A jerin proprietât dal Patriarcje di Aquilee che inte seconde metât dal secul XIII ju regalà ai conts di Gurize tant che feut.

Intal 1312 il bosc al passà di man dai conts di Gurize ae famee dai siôrs di Strassolt, che a jerin lôr vassals fidâts. Intal 1366 ducj i bens dai feuts dai Strassolts a passarin al Comun di Muçane in gracie di un contrat enfiteutic che al sarès durât par simpri, tant al è che, dopo tancj agns, il Comun al è ancjemò proprietari des tieris. Vie pe Ete di Mieç i boscs a garantivin une jentrade impuartante al Comun che, sot dal domini de Republiche di Sant Marc, al invià un cumierç badiâl di len pes nâfs, che midiant dai flums e de marine al rivave dret li dal Arsenâl di Vignesie.

La ete moderne e à viodude bonificade dute la zone dai palûts di Muçane intai prins agns dal Nûfcent, cuntune modifiche complete dai fonts che e à puartât a pierdi une vore di bosc (cuasi dut) a pet di cjamps di coltivâ.

I avigniments storics a àn creât un leam une vore strent e indurant tra la comunitât di Muçane e i siei boscs, che cumò a son tutelâts midiant di leçs di pueste a nivel european, nazionâl e regjonâl, di mût di garantî la integritât dal puest.

In gracie di chest cuadri normatîf, vie pai prins doi decenis dal secul gnûf lis diviersis aministrazions comunâls no àn dome prudelade la tutele midiant di iniziativis di pueste, ma a àn ancje slargjade la superficie dai doi boscs, cun plen ricognossiment dal lôr valôr ecologjic, sociâl e storic.