Itineraris

Si cjape la strade che e passe dilunc dal confin a Sud dal bosc. Al è un troi di jerbe dut dret, li che si pues passâ ancje cu lis bicicletis e che une volte al jere un toc de Romea Strata, un antîc itinerari di pelegrinaç.
Il troi al mene fin sul puint parsore dal Turgnan, po dopo al va indenant intal comun di Palaçûl.

Secont de stagjon, dilunc dal percors o podarìn viodi a sflorî diviersis speciis erbaciis, tant che lis orchideis, il lin, la valeriane, l’hemerocallis (zi zâl).
In Mai si puedin cjatâ freulutis di bosc, piçulis e dolcitis, vie pe Sierade miluçs e ciespis salvadis.

A man drete il bosc nus mostre dutis lis sôs speciis di arbui. In plui dai gjenars principâi (rôl, olm, frassin e çamar), o cjatìn ancje lis essencis che a cressin inte zone plui periferiche e che a àn bisugne di plui lûs e aghe: salet, olnâr, baraç blanc, miluçâr e pôl. I doi fossâi di ca e di là de strade a son plens di vite nemâl: se si reste in vuaite e cidins, cuntun tic di fortune si puedin intivâ, biel che si scjaldin sot dal soreli: la bisse cul golâr, la magne, il carbon e la lipare.
A son ancje tancj anfibis, tant che il crot, il muc cu la panze zale, il triton e la craçule, che si le cognòs dal viers carateristic.
Lis tantis rosis a clamin dongje cetancj insets, tant che paveis, coleotars e imenotars.

A çampe de strade si cjatin cjamps coltivâts ma dopo uns 400 metris al tache il bosc “Toronde seconde”, sparagnât des oparis di disboscament tai prins agns Setante. Culì, midiant di dôs jentradis, si pues lâ dentri dal bosc e cognossilu di dongje. Dentri al è cualchi splaç dulà fermâsi, cjalâ, tocjâ lis scussis, vualmâ foncs e ricognossi trop siôr che al è il sotbosc. Rivâts achì si pues tornâ indaûr o ben lâ indevant cun chei altris itineraris.

Di “Turunduze” e lant daûr dal itinerari 1 si va indevant par uns 1100 metris fin al “Stradon di Miez”, a man drete, che al taie il bosc a miezis in direzion di Nord a Sud.

Il troi forestâl, par solit sierât aes machinis, al è facil ancje par fruts piçui e par vielis. Ancje se si cjamine parsore di une strade cjarezabile, si pues jentrâ dal dut dentri dal bosc, amirant sedi il fueam dai arbui cun pedâl alt sedi il sotbosc une vore fis.

Daspò di uns 1500 metris il bosc al finìs: si pues tornâ indaûr, ma ancje tornâ dentri cjapant un altri itinerari.

La strade une vore largje e regolâr nus fâs tornâ indaûr al sflandôr dal “Bosc di cumun”, ven a stâi a cuant che il bosc, doprât par ûs civics, al garantive une buine risorse economiche pe comunitât. Il bosc e i prâts dongje o dentri a vignivin gjestîts e doprâts par fâ len o ben par fâ fen pes bestiis. Il “Stradon di Miez” e jere la vie principâl che e meteve in colegament sedi lis particulis di bosc, sedi lis stradis che a menavin tal centri dal paîs.

Di “Turunduze” e lant daûr dal itinerari 1, o lin indevant plui o mancul par 740 metris, li che a man drete o cjatarìn un puintut, fat di “slipers” (i traviersagns de ferade), che al scjavace il fossalon in bande de strade. Achì al tache l’ ”Arzarin”, un troi che al passe dentri intal bosc e che al va daûr di un arzin antîc, che di chel al cjape ancje il non. Fats 380 metris dopo dal puintut o incrosìn un altri troi, o ben la “strade Capasse” (2), che e fâs part dal prossim itinerari. Noaltris invezit o tirìn dret.

Dilunc de cjaminade, bisugne stâ atents di no inçopedâsi intor des lidrîs dai arbui che si sburtin fin sul troi e a somein metinus in vuaite: “achì tu sês a cjase nestre!”. Daûr de stagjon, o podarìn gjoldi di diviersis rosis in butul: di ca e di là dal troi al sarà dut sfodrât di primulis, polmonariis, cidivocs. Li che il sot bosc al è plui fit o cjatarìn invezit a plen di ruscli e cualchi felet.

Di “Turunduze” e lant daûr dal itinerari 2, o cjapìn il “Stradon di Miez” lant indevant par uns 250 metris, fin a rivâ li de beorcje cuntun troi larc a man çampe, segnât ancje dal cartel “Cès da le Bancjidiele” (itinerari 5). O lin indevant ancjemò cualchi metri, po dopo o cjapìn un troi une vore strent a man drete, che al va indentri tal fis dal bosc. E je la “Strade Capasse” che e scjavace in direzion Est/Ovest dut il toc di bosc clamât “Toronde prime”. Nol è un troi turistic, parcè che ta cualchi toc al è escursionistic e bisugne stâ atents massime cuant che si cjate pantan, o se di no cualchi arbul crevât e i baraçs che a rindin plui faturôs lâ indevant. A son piçulis dificoltâts che però a vegnin ripaiadis dal ambient, plen di sugjestions. Dilunc dal troi o podìn cjatâsi denant di cualchi esemplâr di rôi e di çamars une vore vielis e bocons. Cuant che o vin scrit chestis riis a jerin ancje un pâr di arbui muarts cuvierts di foncs o travanâts dal pic: ancje chest al è il bosc.

Sul finî dal Invier a sflorissin i cincingots (campanelis di Invier, Galanthus nivalis), po dopo daûr a rivin lis primulis o pestelacs (Primula vulgaris), lis violis blancjis (Viola alba Besser) e lis campanelis (Leucojum vernum).

Biel che o cjaminìn, in bande dal troi o podarìn viodi cualchi buse sgjavade par recuperâ ce che al covente par tornâ a insaldâ il troi. In cualchi moment dal an si jemplin di aghe e nus dan la pussibilitât di viodi un bon numar di anfibis che i vivin dentri e che a fasin i ûfs.

Sù par jù a mieze strade o incrosìn l’ “Arzarin” (itinerari 3), e dopo uns dîs metris a man drete e je une aree plui basse, clamade “Poze dal Scuaiat”, li che e je simpri un pocje di aghe, a part cuant che al è tant sut. Achì si puedin viodi, in plui dai anfibis, ancje vencjârs e olnârs, ven a stâi arbui che a àn bisugne di tiere umide e che par solit no cressin dentri dal bosc ma dome sui ôrs e dongje dai fossâi.

Dongje de aghe si puedin viodi a svolâ insets, massime paveis e svuarbecjavai, e al è plen di sedâl (Carex acutiformis) e di iridis (Iris germanica).

Si inviìn pal itinerari 4 che o vin nomenât za prime. Cjapìn la indicazion par “Ces da le Bancjidiele” e, dopo di uns 200 metris dilunc dal “Stradon di Miez” o cjatarìn a man çampe un troi forestâl cun segnade la nestre destinazion.

Al è un percors che za intal periodi di dominazion de Republiche di Vignesie al menave tal flum Turgnan, li che al jere un puartut. Culì il len dai boscs al vignive cjamât parsore di batelis che a disfrutavin i trois di aghe dal flum e de marine, par dopo rivâ a destinazion. Cumò la strade si ferme prime di rivâ li dal flum, par vie di un fossâl che al zire ator dal bosc e dal arzin che al è stât alçât. La strade e finìs intun toc li che no si taie di agnorums, cul bosc che al mostre la sô muse plui vere, cun frassins une vore alts, rôi e çamars vielons. Il fueam al fâs une vore di ombrene e i impedìs al sotbosc di cressi in maniere masse fisse. Cundut achel, li sot a rivin a sflorî i zîs di Mars (Lilium martagon) e i bocaluts (Convallaria majali)

Dilunc dal percors o cjatarìn ancje cetatancj cividoc velegnôs, che a sflorissin sul finî dal Istât, e vie pe Vierte ancje i biei anemui.

Cumò come cumò, il troi al è ben tignût fin a mieze vie, plui innà al è dificil lâ indevant par vie dai baraçs. Il kml che si pues discjamâ al fâs riferiment al toc che si pues fâ cence bacilâ.

Chest al è l’itinerari plui lunc ma ancje chel che al regale plui emozions e che nus da la pussibilitât di scjavaçâ dut il bosc, prime di Nord a Sud e po dopo di Est a Ovest.

O lin daûr dal itinerari 3 e ae fin dal troi “Arzarin” o cjatarìn su la çampe la indicazion “Soreli jevât”. O cjapìn chest troi che prime nus fâs traviersâ il “Stradon di Miez” e po dopo, lant daûr dal percors “Soreli a mont” nus fâs rivâ fin ae fin dal bosc de bande a Ovest, cuasi sul flum Turgnan.

Intal prin toc di “Soreli jevât” il percors al è un tic rialçât e nus lasse viodi il bosc intune maniere diferente. Sul finî dal Invier si podin viodi tancj cidivocs. Viers la fin, sul troi di “Soreli a mont”, in plui de specie Daphne e des orchideis, o cjatìn ancje miluçârs salvadis che a fasin tantis pomis, piçulis e bielis, ma che no si rive a frontâlis. Intal fossâl a ôr de strade si puedin viodi lis feradis dai cenglârs che a van a svuacarâsi tal pantan.

Il percors al tocje zonis che no son tant fissis, ma che a lassin intivâ la vivarositât dal ambient dal bosc: il soreli al jentre jenfri il fueam, ancje se si puedin cjatâ areis plui fissis, che cualchi volte no si rive nancje a passâi tal mieç, simpri in ombrene par vie dal barascjam di arbui e arbossits, baraçs e plantis rampighinis, tant che lis elaris o lis blaudinariis (des speciis de Clematis).