A son passe 400 lis speciis epigjeis e ipogjeis che si cjatin tai boscs di Muçane, almancul chês scuviertis fin cumò.
I mês che a van di Otubar a Novembar a son chei juscj par fâ une cjaminade e cirî foncs, parcè che al è il moment dulà che e cres la plui part dai foncs e salacor chei plui biei.
No podìn dismenteâ di dâ une cjalade ai foncs ancje ta chês altris stagjons sei tal periodi de Vierte, cuant che a frutin lis Morchelle ssp., sei vie pal Unvier pe presince des Polyporaceae s.l.
Ancje la Istât e pues regalâ sorpresis, baste dâ un cuc ae Russula carpini e a altris speciis plui o mancul cognossudis.
I boscs a puedin dânus ancje des sodisfazions dal pont di viste dal mangjâ, viodût che si puedin cjatâ il Boletus edulis e il so grup, Armillaria ssp., la Russula cyanoxantha, la Russula virescens, il Pleurotus ostreatus e lis trifulis tant che il preseât Tuber magnatum (trifule blancje).
Si ricuarde che il “bosc di Comun” al è un ben civic e duncje dome la comunitât di Muçane e pues doprâlu par lâ a cjapâ sù foncs e trifulis.
Foncs sì, ma no par ducj
Il bosc “Baredi/Selva d’Arvonchi” al è sogjet a ûs civic e partant il sfrutament des sôs risorsis, tant che la racuelte dai foncs e des trifulis, al è riservât ae comunitât di Muçane.
