Home 5 Flore e foncs 5 Briofitis

Briofitis

I magnifics 7

Pensait che par cumò dentri dal Comun di Muçane a son stadis cjatadis, tra musclis e epatichis, nuie di mancul che 7 speciis che a fasin part de Liste Rosse des Briofitis di Italie.

Cu lis sôs 100 speciis, la flore briologjiche dai boscs e je une vore interessante.
Lis briofitis a son plantis une vore piçulis, viodût che no àn un sisteme vascolâr, duncje a supin la aghe par capilaritât midiant di dute la superficie de plante.A son dividudis in trê grups: Bryophyta (musclis), Marchantiophyta (epatichis), Anthocerotophyta (antocerotis).
Cheste division e je peade soredut aes carateristichis morfologjichis macro e microscopichis.Intai musclis si puedin di fat viodi rizoits (une sorte di lidrisute cun funzion principâl di ancorament) pluricelulârs, une disposizion frecuente a spirâl des fueis su lis cjanis e sui ramaçs, une capsule cun dincj ator de bocje.
Lis epatichis invezit a puedin vê un cuarp plat (thallus), slungjât e lobât, che al vîf tacât dal substrât midiant di rizoits unicelulârs, o ben a puedin someâ plens di fueis ma cence une vere distinzion tra fust e fuee.
Cun di plui, lis celulis des epatichis a presentin cuarps oleôs.Lis antocerotis a àn un cuarp plat (thallus) ma a son diferentis des epatichis parcè che ur mancje il cuarp oleôs intes celulis e no àn scaiis inte pagjine inferiôr dal thallus.

In dì di vuê, tai boscs di Muçane a son censidis 83 speciis di musclis e 17 di epatichis. A chestis bisugne zontâ altris 4 speciis di musclis e 2 di epatichis in areis plui sometudis ae azion antropiche.
A mancjin dal dut lis antocerotis.
Il prin contribût su chest argoment al è jessût intal 1999, par cure di Francesco Sguazzin. Lis ricercjis a son ladis indevant par cetancj agns cul jutori di Renzo Casasola e a àn puartât a une incressite impuartante dal numar dai taxa segnalâts midiant des diviersis publicazions.
Ancje se a prin voli a podaressin someâ di nissun cont, lis briofitis a àn un rûl ecologjic impuartant tant che chel de vegjetazion superiôr.
A fasin la fotosintesi doprant la CO2, tant che chês altris plantis verdis, a dan acet a un grant numar di microorganisims e di piçui invertebrâts, tant che rotifers, tardigrâts, ragns, acars, centpîts e crustacis. Cun di plui, a coventin a biomonitorâ lis flutuazions climatichis e i nivei di incuinament. Une division dal ream vegjetâl che e merete la stesse atenzion des plantis vascolârs.