Un binocul simpri daûr
Inte zone dai boscs e de marine si pues viodi plui dal 60% de avifaune presinte ta dut il teritori nazionâl.
Tai boscs di Muçane e tal teritori dulintor si cjatin tantis speciis di uciei, in gracie de unicitât dai boscs di planure e de vicinance da la lagune di Maran.
I moments dal an li che a son presintis plui speciis a son chei de migrazion de Vierte e di chê autunâl, cuant che massime tes zonis di “ecoton” (ven a dî chês di confin jenfri ambients diviers) si puedin cjatâ il cjâf neri (Silvya atricapilla), la vuite (Phylloscopus ssp.), Ficedula ssp., il dordel (Turdus ssp). Cualchi metri plui innà, dilunc dai canelârs, si puedin viodi i uciei che si nudrissin di insets, ven a stâi il moratolon (Acrocephalus palustris), la passare di palût (Emberiza schoeniclus) e uciei di aghe tant che il frisul (Podiceps cristatus) e la folighe (Fulica atra).
A son tancj pics neris (Dryocopus martius) e rapaçs diurnis tant che il nibli (Milvus migrans) e il falcon di âfs (Pernis apivorus).
Ae fin dal Invier, o podìn cjatâ une vore di speciis interessantis (papecrots, ocjis,…) tai cjamps e tai fossâi dulà che a van a cirî di mangjâ. Si puedin ancje viodi grancj scjaps di pavoncins (Vanellus vanellus) e nol è râr rivâ a intraviodi cualchi coridôr clameploie (Pluvialis apricaria).
Vier la fin de Vierte e vie pal Istât lis osservazions tal bosc a son di fâ a matine adore e si puedin ricognossi i cjants e i riclams, parcè che lis temperaduris e la vegjetazion vivarose a judin i uciei a restâ platâts.
