Il teritori di Muçane, dal moment che si cjate juste tal jenfri tra la lagune di Maran a Sud e la linie des risultivis a Nord, al è siôr di aghis.
Tra lis plui impuartantis si à il flum di risultive Ravoncli, che dilunc vie dal so cors al mude il so non in Muçanele, il flum Turgnan e il canâl Cormôr, di origjin moreniche e di caratar torenziâl, che al è stât canalizât te sô ultime part tai agns Cincuante.
Ducj chescj flums a van a butâsi in lagune, dulà che la lôr salinitât e ven modificade des aghis salmastris cuant che e je la alte maree.
Aghis cussì diferentis, no cate il teritori avonde piçul, a àn puartât a di une presince di cetantis speciis di pes, sei di aghe dolce sei di aghe salade, tant al è che a son presintis dutis lis speciis ricognossudis de Regjon Friûl – V.J. La liste in zonte, in plui des speciis di chenti e à ancje chês di fûr, ven a stâi chês introdusudis dal om o rivadis di bessolis di plui o mancul timp.
Un esempli al è chel de raine (Cyprinus carpio), che e ven considerade di chenti ancje se e jere stade menade dai romans tai timps antîcs e la Perca fluvialis presinte di simpri tal flum Stele ma rivade tes aghis di Muçane che nol è tant.
Te liste a son dentri ancje lis speciis “eurialinis”, ven a stâi chês che a vegnin sù de lagune dilunc dai flum.
Dolç e salât, une grande varietât
La varietât di tipologjiis di aghis, ancje se intune aree pluitost limitade, e à favorît la presince di une faune itiche siore di varietâts, sedi di aghe dolce che di aghe salade. Cun di fat si cjatin cuasi dutis lis speciis cognossudis te nestre regjon.
