La nestre associazion e je nassude intal 2006 a Muçane, un paisut de Basse furlane, cun chê di creâ ocasions par stâ insiemi intal nestri teritori e par cressi dal pont di viste culturâl.
Vie pai agns o vin organizât presentazions di libris, laboratoris, spetacui teatrâi, concierts, seradis di aprofondiment e cetantis altris iniziativis. Si sin interessâts di tradizions locâls e di culturis lontanis, di ambients naturâi e di biodiversitât, di musiche e di leterature, di memorie de Resistence e di esperiencis di resistence in timps e lûcs diviers dal nestri.
Tra lis nestris ativitâts, la rassegne che nus viôt plui impegnâts si clame “Vino di lei?”, là che o presentìn un libri e une cantine di vins dentri dai curtîi e dai zardins privâts di Muçane e dai paîs dongje, fasintju deventâ par une sere un lûc comunitari, di incuintri e di confront. In cuindis edizions o vin dât acet a passe cuarante autôrs, tant che Pino Roveredo, Margherita Hack, Massimo Zamboni, Furio Honsell, Tullio Avoledo, Angelo Floramo, Pierluigi Di Piazza, Maurizio Mattiuzza e Franco Fabbro.
Intal 2009 o vin metût adun un grup di passionâts e di ricercjadôrs naturalistics, inviant un percors di condivision e di divulgazion pe difese e pe valorizazion dai boscs di Muçane, che al à puartât a inmaneâ events di aprofondiment cun biolics e ricercjadôrs esperts, escursions vuidadis e soredut a dâ vite al sît [www.boschidimuzzana.it](https://www.boschidimuzzana.it).
Intal 2015 o vin produsût, intune cun Radio Onde Furlane, “Bestiis forestis”: il prin disc dai Laipnessless, un tercet punk folk fûr dal vade di Muçane.
Intal 2020, in colaborazion cu la sezion dal puest de Anpi (Associazion nazionâl Partesans di Italie) e cu la colaborazion di nûf Comuns dal teritori, o vin inviât un grant progjet par celebrâ il setantesim aniversari des Lotis dal Cormôr, une grande mobilitazion pal lavôr che intal Mai dal 1950 al à vût il so cûr propit inte Basse Furlane. Il progjet, tra lis tantis iniziativis che si puedin consultâ intal sît www.lottedelcormor.eu, al à puartât ae realizazion di un radio-documentari lât in onde su Radio 3 dentri de trasmission “Tre Soldi”.
Cuant che si cjatìn, e lis ocasions no son mai avonde, o fevelìn di plantis, di mamifars, di pescje, di ricetis, di vin, di politiche locâl e, al è clâr, dal “nestri” bosc.
Se o vessin di dissegnâsi, si pituraressin tant che un arbul cu lis lidrîs in Friûl e i ramaçs sul mont.
Se tu vuelis deventâ soci o contribuî ta cualchi maniere aes nestris ativitâts, tu puedis scrivi ae direzion di pueste eletroniche [artetica.muzzana@gmail.com](mailto:artetica.muzzana@gmail.com).
…si protêç ce che si ame
e si ame ce che si cognòs.
F. Sguazzin
Contribûts e ringraciaments
A àn colaborât ae realizazion dal sît boschidimuzzana.it: Fabio Del Piccolo, Lorenzo Casadio, Margherita Pevere, Maria Pevere, Mattia Bianco, Luisa Bianco, Loretta Cogoi, Marco Del Piccolo, Stefano Romano, Massimo Del Ponte, Gianni Fumi, Giorgio Guzzon, Renzo Casasola, Federica Moro.
Fotografiis di Gabriele Paternich, Gianni Fumi, Giorgio Guzzon.
Progjet web di Joshua Cesa e Andrea Tessari.
Tescj par cure de Associazion Culturâl Artetica.
Version par inglês par cure di Margherita Pevere, Linda Pevere e Sofia Maran.
Version par furlan par cure di Serena Fogolini, Sportel associât pe lenghe furlane dai Comuns di Cjarlins, Gonârs, Muçane, Porpêt, Prissinins e San Zorç di Noiâr
Il nestri agrât pe consulence sientifiche: Prof. Francesco Sguazzin, Dott. Luca Lapini, Emanuele Campo, Dott. Claudio Angelini, Dott. Tiziano Fiorenza, Prof. Pietro Zandigiacomo.
Graciis ae Fondazione Benetton Studi e Ricerche pes informazions su la Kriegskarte 1798 – 1805 di Anton Von Zach.
Il nestri agrât ancje a:
Associazione Culturale “La Bassa”